فلا أقبله - حسين خميس آل علي

تريّث قبل لا تاخذ قرارك
وخلني يالغلا أبدي إعتذاري

ولا تغيّر حبيبي في مسارك
ولا تبعد فديتك عن مساري

صروف الدهر ما هي بإختيارك
ولا في يوم كانت بإختياري

كواني الشوق وآنا في إنتظارك
وقلبي مل من طول إنتظاري

فؤادي والعقل دوم بمعارك
وفكري غاطس بلجّة بحاري

سؤالي عنك في الصبح ونهارك
وإذا جا الليل أسأل كل ساري

تعبت آروح وأرجع صوب دارك
بغيت أنظرك صوب الدار خاري

أنا أرتاح يوم أسمع حوارك
على الهاتف تبادلني حواري

غلاك اليوم فايض عن بحارك
وحبي لك عدد رمل الصحاري

عرفت الصدق يالغالي شعارك
وأنا الإخلاص في حبّك شعاري

كفايه لا تحرّقني بنارك
رجيتك يالغلا بقلبي تداري

وإذا منّك تبي تاخذ بثارك
أنا منّك أبي رد اعتباري

وإذا بعدين قدّمت إعتذارك
فلا أقبله هذا هو قراري

ظبي مع طير صفرٍ في مدارك
كتابٍ يفهم اللّي كان قاري

© 2024 - موقع الشعر