‎ما نباها البنت غربيّه - حسين خميس آل علي

اظهرت (م) البيت تتجوّل
‎واذهبت للسوق في بغيه

سارت الخياط بتفصّل
‎ثوبٍ مطرّز هالبنيه

يت وقالت له خذ تفضل
‎هذي القطعه التي ليه

سوّ لي ثوبٍ حلو يهبّل
‎طرّزه بفصوص ورديه

طرّزه باللولو وعدّل
‎وحط له (م) الفولك شويه

من ورا خله لي امبطّل
‎باب للساقين خل إليه

ذي شروطي لكن استعجل
‎خلصه بسرعه جنونيه

وانته اطلب قول وتدلّل
‎عطني القيمه الخصوصيه

قايس الخياط وتمهل
‎قال يبغي ألف وسبعميه

واعطته ألف ومتى يكمل
‎ثوبها باتيب لوفيه

واطلعت ثم ادخلت إيفل
‎واشترت عقد بثمان إميه

من بعد مرت على أجمل
‎واشترت عطر بثلاثميه

من عقب سارت بتتعدل
‎مرت الصالون في الييه

قصرت (م) الشعر لا يطول
‎وقصت البكله لأماميه

وحطت المكياج لمشكل
‎‏(ع) الوجه حمره إنجليزيه

الله أكبر شكلها يخبّل
‎من نظرها قال جنّيه

والنهايه ردت المنزل
‎وهي تضحك والقهر فيه

يرحم الله وقتنا لأول
‎يوم كنا نعيش في غيه

بنتنا ما تعلم وتندل
‎كيف درب السوق موليه

كانت العيشه قبل أسهل
‎من حياة اليوم لمعنيه

ليت من يسمعنيه يعقل
‎ما نباها البنت غربيّه

بالأجانب دوم تتمثل
‎تتبع الموضه الحضاريه

ما نبا هاليور يتغلغل
‎في البلادين الخليجيه

ما يهمني وش بعد يحصل
‎قلت كلمه.. ولا يهمنيه

كلمتي في آخر المزمل
‎ما نباها البنت غربيّه

© 2024 - موقع الشعر