صرف الحروف

لـ عبدالعزيز الشاطري، ، في غير مُحدد، آخر تحديث

صرف الحروف - عبدالعزيز الشاطري

قصايد الشاعر كلامٍ يدينه
ما بين جزل العلم والا رديّه

بحْدود دينه قال زينه وشينه
الزين له حسنات والشين سيّه

واليا ظْهرت للناس تبقى رهينه
للّي يقيس الصايبه والخطيّه

ان قال زين اقول خلك يمينه
خاوه ترى دْروبٍه عزاز ونقيّه

وان كان ما ردّه عن الشين دينه
خله ويلقى له مع الدرب زيّه

يا ماكْثر الشعار لا قيل وينه
الشاعر الفارس نقز فوق ميّه

واليا بدا صرف الحروف الثمينه
يظهر من المية ثلاثة غنيّه

واكثر من الشعار متْناقلينه
واكْثرهم الغاوي يشجع خويّه

وْيا قلّهم لا قلت متْذوقينه
وْيستاهلون لكل واحد تحيّه

كلٍّ على ما قيل عقله عوينه
من وين ما ودّاه يلقى حليّه

احد عيونه تصرفه للسمينه
يتعب لها ما بين روحه وجيّه

واحد عن الهزلات ما ردّ عينه
يفرح بها ويحطها له مطيّه

والشعر كله صيد يا قايلينه
والصيد له قناص وبوارديّه

اللي قريّب تمسكه له يدينه
واللي بعيد تْجيبه البندقيّه

واللي من الثنتين يفلس غبينه
يرجع على الجايد ليا فات نيّه

© 2024 - موقع الشعر