من قتل يا جده أحلام العروس ! - سامي الوسيدي

استوى نظم القوافي يالهجوس
وحان مسرانا مع الليل الطويل

عقّد (إ) حجاجي سواليف النجوس
كيف عافونا / عقب صنع الجميل؟

قابلونا : ( لكن بوجهٍ عبوس )
قبّح الله صيتهم مع كل جيل

يحسبون المرجلة جمع الفلوس
ما لقينا بالعرب فيهم مثيل

ليتنا ندري عن ضعاف النفوس
قبل نعطيهم من القدر الجليل

القضية : لو نلبسها الهروس
ما تغطيها عقب شوف الدليل

من قتل يا جده أحلام العروس !
من رماها لين ماتت بالمسيل !

طاهره ، متعاليه ، شمس الشموس
وأرخصوها من عميل إلى عميل

غلطةٍ منها تعلمنا الدروس
إفهقت كل الخطاوي للرحيل

وكانها حربٍ مثل حرب البسوس
والله إن نشعل بها راس الفتيل

نقتلع ضرسٍ تغلغل فيه سوس
ما نقول إنه علينا مستحيل

ما علينا من قيام ومن جلوس
محتمين أقوالنا عن كل ميل

© 2024 - موقع الشعر