العروس - ناصر القحطاني

خوية درب عمري ما خذاني دونها النسيان
وانا يا اهل الملامه ما رغبت العيش وحداني

ابي مهرة ما عسفت صغيره وبنت حصان
ابوها اللي يفك المشكله و يزبن الجاني

و اخوها لا تعزوى بإسمها فزوّا لها العربان
يحق الها الفخر في قولة آل فلان جداني

ابيها في بحر عشرين لا زود ولا نقصان
ابيها اقصر طويله و الوصوف اشكال و الواني

ابي الجبهه كما الصبح وكما القوس اسود الحجان
وابيها ناعسات و نرجسية سود الاعياني

ابي رمش كما ريش يغطي الثلج في الاوجان
وابي جفن يشيل الرمش طربان و كسلاني

وابي خد مثل ورد تنمّى في طرف بستان
وابي خشم صغير ومثل حد السيف شاماني

ابي البسمه كما البرق و ثناياها كما المرجان
شفاها جمرتين و فمها خاتم سليماني

ابي شعر كما ذيل الفرس لا طبت الميدان
او الشلال لامن بيت ليله بين الامتاني

ابي جيد سواة بريق فضة ناتق مليان
وصدر كنه مرايه عليها طلع رماني

ابيها نابية ردف .. وبطن ضامر جوعان
ابيها مدمجة ساق وو قدمها لسان ثعباني

ابيها بنت عز من رغدها ينعم الفستان
ابي الرقه وابي الدقه لها بطرافها شاني

ابي المشية كما اللي طالع من المعركة كسبان
وابيها ترش مع خطواتها مسك و ريحاني

ابي صوت إلى مني سمعته كن فيه الحان
يدغدغ مسمعي ويثير كل الشعر فأشجاني

ابيها حب و اخلاص وهواجيس وفرح واحزان
ابيها مثل ما دكتورها للعشق وصاني

ابيها لوحة ما صورتها ريشة الفنان
ابيها جوهره ما جابها قاصي ولا داني

ابيها تنتصر لي من زمان حطني نيشان
وتبشر بالغلا اللي ما لفابه واحد ثاني

مهرها قبل و شعر يهز القلب و الوجدان
و البسها القصيد و تصبح اوزاني و قيفاني

ابي اللي فات و اللي فات صعب ومن لقى العنوان
يرد العلم و لا أفضل ابقى اعيش وحداني .

© 2024 - موقع الشعر