رقيق الأحاسيس

لـ شائم الهمزاني، ، في العائلي والاجتماعي، آخر تحديث

رقيق الأحاسيس - شائم الهمزاني

يا صاحبي: لومك علي ما هو مقياس
عندك ، مقاييس وعندي مقاييس

أنا المبادئ في صميمي لها ساس
تسمو بها ذاتي على (عرش بلقيس)

فيها شموخي يلبس الدرع والطاس
بالعالية ، دونه بروج ومتاريس

والحي ما يصبر على كتم الأنفاس
والمرجلة ، فيني فراسة وتدريس

في واجبي مثل (المهلهل) و(جسَّاس)
بإحساسي المسئول فيها الهواجيس

وعمر الأسد ما ينتظر كومة بْساس
ولاهوب ينفع فاقد الحس تحسيس

أقوم بالواجب ويخسون الأخساس
اللي ، لهم بالظلم ناسٍ محابيس

لو واقعي فاسد وطايح ومنداس
ما عاد في صدري للأنفاس تنفيس

عندي ضميرٍ حي بالناس حساس
في مرْهف إحساسي رقيق الأحاسيس

شفت التجافي بيننا يرفع الكاس
ويزداد ، بين الناس عمقٍ وتكريس

ما بينهم ، سعيت في ضوء نبراس
ولا جاء على النبراس غير الرواميس

وأشعلت نيراني على راس مقباس
ولا ، لقى المقباس..فيهم فوانيس

وأجري على الله لو نصيبي بالإفلاس
تعبت أطارد بالعجاج القراطيس

لإصلاح ، ذات البين ومواصل الناس
وإصلاح ما بدروبهم من عواكيس

أوادمٍ ؛ فيهم عن الحق وسواس
على بعض في روسهم يلعب (إبليس)

نَمَّام ومنافق وأناني وبلاس
هوايشٍ ، لكن خساسٍ مناحيس

جميعهم خلصت منهم ولا باس
عرفتهم (جيل الخسارة) مفاليس

حتى مجرد ذكرهم يوجع الراس
ما تنذكر ، فيهم علوم النواميس

© 2024 - موقع الشعر