مجاراته للأمير السامر (2) - ثواب بن زيد

سلمان نجد.. ونجد.. حظه حليفه
بمحيِِر عقول الرجال الفهايم

شامخ شموخ الشامخات المنيفه
اللي تحتها يسبح الغيم غايم

يضيم من ينهب حقوق الضعيفه
وسمن على كبد المعادين زايم

احد من حد السيوف الرهيفه
وتضيع مع عزمه كبار العزايم

اميرنا في نجد (يندر) وصيفه
ولاكل اميرن للاماره املايم

الله يعين اللي يجي له خليفه
يصير في بحر الشرابيك عايم

الحكم كايد والاماره كليفه
ماهيب سكب ابشوت والاعمايم

في مجلسه نلقى العلوم الطريفه
ونلقى الذرا عن حاميات السمايم

ثقيل يوم اقدام غيره خفيفه
ولا زحزحت ثقله هبوب النسايم

قلبي وانا من نشوتي مستضيفه
ستر العذارى لابسات اللثايم

احيا واموت وشخص سلمان ضيفه
وعن الهقاوي فيه ماني بشايم

شوفه نعن به المهار العسيفه
ونكسر شعور اليأس والحظ قايم

ونجيه بنفوس الرجال العفيفه
ولاحدن لمن هو يقصد المجد لايم

وسلمان يرفع للمعالي رديفه
وعمود للحلم القديم ودعايم

موجن ليا حد المراكب لسيفه
ترسي على سيفه بليا قوايم

وراسن عمسه الضيم سلمان كيفه
يجلا العماس .. وينعمس.. كل ضايم

ولولاك ياعشق الرياض ووليفه
ماسقت قافي بين بايع وسايم

اخذو مجاراتي لصدر الصحيفه
صعب المعاني والفرايد وسايم

ولا ينزلها منازل كسيفه
ياكود ضميانن على الورد حايم

ياخو فهد من حط شرواك سيفه
مايشتكي من جور وقته ثلايم

ياخو فهد سقنا القوافي عنيفه
ويفطر بحبك سيدي كل صايم

ياسيدي قل.. للقلوب النظيفه
لايحسبون مغمض العين نايم

وعلى ظهور أملافحات السفيفه
حنا لصعبات المواقف ندايم

وغابت فوانيس الليال المخيفه
وعم الامان وللضلال الهزايم

وخشم الجريد اعلى وسام نضيفه
وهذا وفاكم سيدي من قدايم

© 2024 - موقع الشعر