انا البارح بعد ليلي سرا وامضى منه ثلثين
طلبت الله يحقق مبتغى من طالت همومه
على هذا المكان اللي كما نوره نجي بادين
أنول أعلى شرف وأبدي ونار الشوق مشعومه
وتحرك للمحبة والولا بقلوبنا عرقين
تعبرها الحروف اللي من الأشواق منظومه
نجدد من ولانا بيعة الإخلاص للركنين
لبو متعب وابو خالد منار المجد ونجومه
نبايعهم على الدين الحنيف وعاشوا الأخوين
سلالة من بنى الصرح العظيم ثبت رسومه
ولو الشعر يوفي حق أبو فيصل كتبنا لين
نوفي حق من مجّد بلاده واتعب خصومه
ولكن يرحم الله من تفانا للبلاد سنين
عسى روحه ما هي من رحمة المعبود محرومه
سلام الله سلام له مكان وله زمان وحين
سلام ودام راس اللي يعز الحفل بقدومه
سلامٍ عارفٍ منصاه غالي قدر للغالين
بعد نور الفرح شعش علينا وابتدا يومه
منصا من صدق ذات وعلى الأقصين والأدنين
أزف اسمى تعابيرٍ عن التقصير محشومه
بعد هجرس بها الصدر الوسيع ومرحبا وأهلين
عدد وبل الغشين اللي يهل وتسبح اغيومه
هجوسي ما يهيضها حمام الورق لو أيزين
بصوتٍ شاديٍ لحنه وصافي جوٍ يحومه
يهيضني وقوفي وامتثال العز بين أيدين
مليكٍ ما تغير في نهار الشدة عزومه
حبيب الشعب أبو متعب لاجت وحده من الثنتين
طناخة راسه الراسي تخل الروس ملخومه
أبو متعب ذر اللي يشكي الظلم ويشوف البين
مليكٍ ما تعداه المواقف غير محسومه
أبو متعب لاجا اليوم العبوس القمطرير الشين
نشوف العز بحجاجه يلوح وللسعد قومه
أبو متعب عما عين الحريب ومزبن اللاجين
صليب الرأي يا شر النفوس اللي بها زومه
ملكنا اللي لعدوانه يكيل الصاع بالصاعين
سنام المجد عداه ابدهاه وحقق أحلومه
يمكن كل مظلومٍ شكا له مظلمة تمكين
ويضفي به كما يضفى على العريان بهدومه
وأبو خالد بجنبك تاجده في عسر ولا لين
أمدله كل نفس من صدوف الوقت مضيومه
أبو خالد تدون له مواقيف الشرف تدوين
ومشاعرنا تدافع له وفا ماهيب مرغومه
ولي العهد عدٍ مورده يقطع ضما المضمين
وسورٍ للوطن حصنٍ عيون أعداه ملطومه
إلهي نطلبك عونك ولا غيرك ولي ومعّين
تعز المسلمين ودولةٍ بالشرع محكومة
وتكفينا من شرور الضلال ومن غلو الدين
ليا بُليت جهاهيل العرب بفكار مسمومه
بعد دارت رحى الدنيا وشفنا فعلها بالعين
دفعنا ارواحنا للموت والأقدار محتومه
لجل أمن البلاد اللي حكمها خادم البيتين
ولا زال الوطن شامخ ينال المجد ويرومه
على أرضه كم طوا البيدا قدم حافي وخف وقين
مناعير مذاهبها على العيرات محزومه
نعم كنا ولازلنا ومن زل تهاون هين
وحنا شعب ما اختلفت تقاليده ولا سلومه
على شبه الجزيرة والعروبة بالذرا مضفين
نزّبن من نضانا والحريب انضّيع علومه
وهل التوحيد حنا كالجبال الشامخة راسين
حقوق الرجل فينا وافيه ما هيب مهضومه
نحكم الرأي لا منه غدا رأي العرب رايين
نخوض البر زحفٍ لو محيط الأطلس نعومه
تجندنا لجل عز الوطن يا بنت لا تبكين
من عدانا يرّبع كل ذيب وياجد اطعومه
جنود فالقسا نسمى سما مثل السماء سامين
يسمى باسمنا الاسم وأسامينا لها هومه
رجالٍ حلمنا دايم وسيع وفاللقا صلفين
عوايدنا الشموخ ونعتلي والغالي انسومه
لنا روسٍ يسكرها الغضب والكايدات اتلين
وينعشنا هوى نجد العذي ولفحة اسمومه
تربعنا على دارٍ موانيها على شطين
بلادٍ ما خذيناها بوزعة ورث مقسومه
وطن ما هو عقيم وينجب ملوكٍ تفك الدين
فعايلها نعاينها على الواقع ومعلومه
مواقفنا مواقف صاملة ما هيب بين وبين
مواقف ما يحرفها هبيلٍ مد حلقومه
على فكر الضياع ومن عطو مع ساقته مخطين
وجميع أيامكم يا عالم التضليل مشئومه
ألا ياللي سريت ابمحملك يوم العرب ممسين
سريت ابليلةٍ ظلما بها الأنوار معدومه
وقردك الله وصادمت الجبل يا الوعل أبو قرنين
توسدت الوطا وقرونك الثنتين مصرومه
ألا يا المحمل التايه بسم رب الخلايق وين
سألتك وين متوجه ترا وجهتك منجومه
فجعت الطفله اللي هلت الدمعه على الخدين
تخايل دم أبوها طفلةٍ في حضن مضمومه
نواياكم عرفناها وقلنا يا بشر غادين
وتماديتو وطحتوا طيحةٍ ما هيب مرحومه
دخلتو بين لحيان الجمل ثم أطبق اللحيين
ولا زال الجمل لمقرد العربان لا هومه
نعرفك محمل الفكر الدخيل وزمرة الباغين
وجراثيم البشر عنا تموت بموت جرثومه
ولا يدرك عواقيب الأمور ألا ذكي وذهين
ويجهلها الغبي اللي بعدما فاق من نومه
يدور الوقت باحداث الزمن والخافيات اتبين
وطبع النفس عن فعل الخطا ما هيب معصومه
ولكن التمادي ما له ألا السيف أبو حدين
وحربة حق في فج النحر والصدر ملحومه
لا سار الجيل مع نهج صحيح أصبح كما هاتين
ونقراه بعبارة واضحة معنى ومفهومه
يغيّر في معانيها السكون وهمزة التنوين
وتصير حروف مسكونة محل حروف مدغومه
وبلادي ما حميناها بسورٍ مثل سور الصين
بلادي سوره إرجالٍ بصدق إيمان مدعومه
مداغيش العيال اللي فتوق اطعونها شبرين
مداغيشٍ بحب الدار وأهل الدار مغرومه
إلهي نطلبك عونك ولا غيرك ولي ومعين
تعز المسلمين ودولةٍ بالشرع محكومه

تعليقات الزوار

  • كُل المحتوي و التعليقات المنشورة تعبر عن رأي كتّابها ولا تعبر بالضرورة عن رأي موقع الشعر.
  • بعض صور الشعراء و الشاعرات غير صحيحة، نرجو تبليغنا إن واجهت هذى المشكلة
  • إدارة موقع الشعر لا تتابع التعليقات المنشورة او تقوم بالرد عليها إلى نادراً.
  • لتواصل مع ادارة موقع الشعر إضغط هنا.
© 2019 - موقع الشعر - بواسطة شركة المبرمجين