يا فكر هوّن مالك اليوم سجات
ولك سجة(ن) تعجبك لوهي طويلة
نويت اجيبك للجبال المنيفات
اللي مبادي روسها مستحيلة
إلا على اللي في نظرهم طموحات
ماهيب نظرات الذليل الذليلة
وأحلى ليال العمر وأعز الأوقات
لقيا الرجال أهل النفوس النبيلة
وإن كان للعالم والأوطان قادات
قاداتنا رمز لنا ننتمي له
اجعل قبل هذا المثول اعتبارات
والقاف حمله لو ثقل نرتكي له
لو كان ثقله ثقل شمرخ وأبانات
يثنيه شوقي يمتي وإن ثني له
شوق معه زفيت رحب وتحيات
ويعطره وردالصباح وعليله
يامير شوفك للرياجيل غايات
حققتها واليوم هذا دليله
اليوم هذا يوم عيد ومسرات
الله من يوم سحابه نخيله
شرواك نو(ن) وابله له مساحات
يحيي القلوب وكل هم يزيله
يامرحبا يا مير يا صادق الذات
زميلنا ياعز من هو زميله
يامرحبا ونسوقها بأعلى الأصوات
أجمل تراحيب لمتعب جزيله
ابن المليك اللي هجوسه صعيبات
وراية مثل قدح الزند للفتيله
ابن (الهزبر) اللي جهوده حميدات
يشيل مالا كل عاهل يشيله
لاضاقت صدور الرجال الوسيعات
ينصون عبدالله عما كل عيله
وحنا الحرس لبنة عطا من سنوات
ولاضاع جهد(ن) من سنين انعبي له
بندق ودبابه ومدرج مطارات
باق البحر لن راد ربي نجيله
وحي الحرس حي اتساع المجالات
حي العيال اهل العقول الثقيله
حي العيون اللي لها بعد نظرات
ماهي اسيرة ضعف ولاقتيله
حتى غدا للكيف نكهة وميزات
طير عماس الروس بنه وهيله
حرس وطن فالبر والجو قوات
وفي كل رب النا سياسه وحيله
ولنا مواقف حازمة وانتصارات
ومعنا دوا اصحاب القلوب العليله
ولنا مع مستور الحال وقفات
المد وافي والعطايا جزيله
ولنا فالأقصى والموالي علاقات
ولنا مواثيق عريضة طويله
ولنا مع هذا وهذا حسابات
ماتنتهي في يوم واحد وليله
ولنا وعد ولكل دولة سياسات
والرجل يفهم والهبيله هبيله
وأهل الفتن ومروجين الإشاعات
مروجين الكذب قاله وقيله
مقصودهم من سابع المستحيلات
والفكر ضايع والروابع خبيله
للمحكة قاضي وللحق جلسات
في حينها ولكل غاية وسيله
اقولها واعيدها عشر مرات
العدل عدل ولاورى العدل ميله
ومنا الملوك امعدله كل عيلات
وسادو بحكمن مايحكم مثيله
حنا لبدايات الليالي نهايات
نور يشع وصوت حق(ن) نشيله
حنا سنا نور يزيل الظلمات
على كتاب الله وسنة خليله
نموت دون الشرع والشرع مامات
والمسلم الصادق الاهه وكيله

تعليقات الزوار

  • كُل المحتوي و التعليقات المنشورة تعبر عن رأي كتّابها ولا تعبر بالضرورة عن رأي موقع الشعر.
  • بعض صور الشعراء و الشاعرات غير صحيحة، نرجو تبليغنا إن واجهت هذى المشكلة
  • إدارة موقع الشعر لا تتابع التعليقات المنشورة او تقوم بالرد عليها إلى نادراً.
  • لتواصل مع ادارة موقع الشعر إضغط هنا.
© 2019 - موقع الشعر - بواسطة شركة المبرمجين