لاتعتذر ،،، شف قسوتك - تركي السواط

لاتعتذر معاد انا محتاج لاسف يالحبيب
خلاص رددها لسانك لين سمعي عافها

فسرتها البارح وانا تفسيرها عندي عجيب
وغيرتفي ترتيب الاحرف واكتشفت اوصافها

خذ فاءها مع الالف ثم سينها وانت تجيب
على سؤالي وش طلع مردودها واهدافها

تحولت آسف لفاس وقصت الغصن الرطيب
اللي محبتنا سقته وطاح فوق أكتافها

يا صاحبي الى متى وانا معك مثل الغريب
اللي سئم من ديرته من ظلمها واجحافها

الى متى وانا انتظر دنياك تفتح لي نصيب
واسكن جزيرة عالمك واجمع فتات اصدافها

شف قسوتك يا صاحبي ودتني لهاك الطبيب
وشخص مكامن علتي ساعة وصلت وشافها

قال انتى ياهذا الفتى مع الاسف حالك صعيب
روحك تبين كم عمل غيرك على اتلافها

من المحبه الهوا وضعك غدا جدا مريب
وداء الهوا اذا انتشر فالروح شل اطرافها

ويعني بعد هذا تبي اكون من قلبك قريب
وافتح مظاريف العذر وامسح غبار غلافها

لاخلني عايش على بلواي والجرح العطيب
اهون من اعذار الوهم بشكالها واصنافها

وانت ابتعد ياصاحبي يكفيك راسي صار شيب
ويكفيك زودت الهموم اثقالها واخفافها

وانا بدور راحتي حتى لو احساسي صويب
ماينكسر قارب طموح الرحله ومجدافها

وآسف انا بقولها قبل نتوادع يالحبيب
ماعاد يعني لي عذر محبتك واطيافها

© 2024 - موقع الشعر