بطاقة شحن

لـ تركي السواط، ، بواسطة غادة العلوي، في غير مُحدد

بطاقة شحن - تركي السواط

تنبه عاجل والخبر يعرض الآن
والبث في عزف القوافي وحصري

احذر تجيك مكالمة صوت نعسان
وتقول خالد او محمد ويسري

والا تقول آسف انا شخص غلطان
لك اعتذر وانت اقبل الحين عذري

وشوي توصلك رسالة بعنوان
صوتك ملكني!! داخل الدم يسري

ممكن تدق اكلمك يا اروع انسان
وان كان ماودك ماهو شي جبري

ويلا شعور تقول طاحت وسبحان
رب(ن) يسوق الحظ من دون مدري

فرصه وجتني صدق ماني بخسران
اعيش جوي وابسط اليوم فكري

وتبدا علاقة حب وافراح واحزان
واتقول انا عاشق ولله دري

وتنظر لجوالك على نار ولهان
وان دق قلت اهلين يابعد عمري

يافرحة الماضي ويانور الاوطان
مستقبلي انتي ولو طال صبري

وتسمعك فالحب انواع الالحان
وتذوب حتى يصبح الوضع مزري

وتقول احبك واعشقك دوم يافلان
لكن لي عندك طلب قد ظفري

ان كان لي عندك معزه ولي شان
ابي بطاقة شحن واهتم بامري

هذا غرام اليوم من جد ياخوان
البنت باسم الحب باعت وتشري

واللي يبي نصيحتي يعلن الان
الجنس الاخر يهجره مثل هجري

تعليقات الزوار

  • كُل المحتوي و التعليقات المنشورة تعبر عن رأي كتّابها ولا تعبر بالضرورة عن رأي موقع الشعر.
  • التعليقات المنشورة غير متابعة من قبل الإدارة. للتواصل معنا اضغط هنا.
© 2021 - موقع الشعر