سكبه ومنصب والذهب والدنانير ..!! - خالد النبهان الشمري

سكبه ومنصب والذهب والدنانير
أربع عوامل جابت العيد فيني

روح معاهم دون كلمه وتحذير
والكون أصبح شيء تافه بعيني

وألحين يسأل كيف حالك عسي خير؟
أبشر بجامل خير حلوه سنيني!

مير الحقيقيه شي ثاني عن الغير
حزنن عظيمن في خفوقي دفيني

أكتب همومي فوق بيض الدفاتير
والناس تسمع من شعوري ونيني

أذكر طيوفه والبلا كل ما سير
ألقى خياله بين نفسي وبيني

والراس شايب وألعمر توه صغير
والصدر يزفر ضيق خاطر حزيني

ليت المواجع تأخذ اليوم تخدير
والفرح إشوفه من يسار ويميني

وافرد جناحي بالسما فوق واطير
ويرجع لحضني كل غالي ثميني

لكن حقيقه كل أبوها تصاوير
واصبحت أشوفه بين حينن وحيني

يعني فمانه ماتفيد المعاذير
لو كنت ناوي بعد هذا تجيني

وتدري وش الي ماله اليوم تبرير؟؟
أني أشوفك واخسرك من يديني!!

مير المحبه ياحبيبي مقادير
أخذك غيري وانت غيرك ظنيني!

تعليقات الزوار

  • كُل المحتوي و التعليقات المنشورة تعبر عن رأي كتّابها ولا تعبر بالضرورة عن رأي موقع الشعر.
  • التعليقات المنشورة غير متابعة من قبل الإدارة. للتواصل معنا اضغط هنا.
© 2021 - موقع الشعر