طعنتك

شف طعنتك وشلون صاير مداها
شف وين صارت فأخر ضلوع صدري

شفها تصوت لك وترسل صداها
شفها تقول اليوم مليت صبري

نادت عليك الين وقف نداها
واشتاقتلك تحضن مساها وتسري

حتى الحمايم وقفت عن شداها
شف صوتها وشلون ماعاد يغري

لكن تذكر انك اللي بداها
وانك نويت بسود الايام غدري

من فعلة الايام فيك ورداها
نسيت اني بعت لك كل عمري

واللي تركت القلب يلعب معاها
شف قدرها وشلون وتعرف قدري

وادري مثل ماجتك تهدي غلاها
اللي طعتنت بخنجره وسط ظهري

بكره تذوق أيام قلبك ظماها
بكره قناع الوقت يظهر وتدري

وان كنت مخدوع فلذة بكاها
بكره يبيعك دمع ماها ويشري

وبكره تدور الأرض فيك ورحاها
بكره تعرف النجم من وين يسري

لكن تأكد يامدور رضاها
ان فجرها ماراح يشبه لفجري

وتأكد انك لو تعيش فسماها
ان طهرها ماراح يشبه لطهري

وشف طعنتك ياجعل قلبك فداها
شفها تموت وتسألك وين قبري