فايف ستار - عبدالعزيز الشاطري

ياللي خذيتيني من العسر للّين
اصبح غلاك اغلى من النفط للدار

اليا تباعدنا صرفنا الملايين
واليا التقينا نجني الربح مليار

سوق المحبة مرتفع للمحبين
ويزيد لا زادت والا اخْتلت انهار

اشواقنا ما بيننا باي تثمين
والوصل غالي والغلا باب الاسرار

للحب في سلم المحبين دربين
ما بين بعد وقرب .. للوصل مشوار

البعد صحرا تشكي غْيومها سنين
والقرب غيمة صافحتها بالامطار

اروت منابتها من يسار ويمين
واستنشقت من جوفها عطر الازهار

لين اجتمعنا شخص واحد بقلبين
فيها شموع الحب لدروبنا انوار

وْعهد المحبة ثابتٍ بالشرايين
مايقطعه غير المنايا والاقدار

من دونها نبقى على العهد وافين
يفرض علينا الحب من دون نختار

واخر نتاج الحب يا كامل الزين
وش صار لك منها وانا ويش لي صار

بنيت لك في داخل القلب والعين
من الفنادق والفلل فايف ستار

فيها تغنّي والعبي بين الاثنين
وانا يكفيني من اسبابك شهار

© 2024 - موقع الشعر