شق ستار

يا ملّ قلب ٍ ملّ ف الصدر واحتار
ينضح ومجرا الدم يدفع نضيحه

كبير عرض وطول وضلوعه قصار
وأن ضاق ما ضاقت عليه الفسيحه

ما كنّه ألاّ فيه .. صفارة إنذار
أجاهده مع كل نبضه وصيحه

وأحايله وأعطيه تبرير وأعذار
وأفلح على نهج الوجيه الفليحه

جاك البرا مردود للشعر شعّار
يا معشيّ الشاعر لسان الذبيحه

لي نظرتي ما بين .. وجهات الأنظار
ولاهي على كل النواحي صحيحه

أشدّ حبل الفكر من شان يندار
يطرقني الهاجوس لاهبّ ريحه

تعبير والتعبير عن صاير ٍ صار
أرفع نظرها واعتبرها نصيحه

من موجز النشره لتفصيل الأخبار
الوقت جارح .. والنشامى جريحه

والمجتمع شرايحه .. سرّ وإجهار
شريحة ٍ تضحك .. وتبكي شريحه

يا ربّنا الأخلاق في هدم وإعمار
على ثبات رضاك بغضك تزيحه

أهل العقول الراجحه مالها كار
وأهل العقول الفارغه مستريحه

جنايز ( الأسرى ) تسلّم لقبّار
وحنّا نسلهم مع عيون المليحه

ننقز على الطبله ونرقص على الطار
واللي يطيح نصّوره في مطيحه

خيبه وشقّ ستار .. يا سوبر ستار
جيتوا تجروّن الخزا والفضيحه

مرباك ف الجنّه ومثواك ف النار
يا اللي كسبت من الفواحش مديحه

يا كبر شرهتنا على حاكم الدار
منّصب المترديّه .. والنطيحه !