طفلة الحزن أشغلت كل المدينه
والورود تحبّها وتموت فيها
بالرغم من صغرها جدآ رزينه
والطفولة سافرت منها إليها
الدموع بعينها النجلاء سجينه
والبراءة تنسكب من وجنتَيها
لا بكت ضاق البلد في ساكنينه
والكلام يذوب بأوسطْ شفّتَيها
لا اسألوها كيف حالك يالمتينه
تزعل وتضرب جميع اللي يجيها
فاقدة حضن الدفاء حضن السكينه
ما لقت من يرحم ويعطف عليها
تمسي وتصبح وهي وجلة حزينه
يحتضنها الجرح ويقبّل يديها
من جهلها تحسب الدنيا ثمينه
ما درت عن باكر اللي يحتريها
شالها ليل الحزن في راحتَينه
وطارت أسراب الفرح من راحتَيها
من شقاها تلعن العُمر وسِنينه
والنّصيب اللي على الضيق اِيحديها
تختنق بالصمت لا زمجر أنينه
وتكتسي ثوب الضياع ويكتسيها
كنّها تسأل عن الآمان وينه
تائهة والخوف الأقشر معتريها
ماتت البسمة على شفاها غبينه
والزمان الشّين ما سمّى عليها
إضافة تعليق - (( user.name )) - خروج
ادارة موقع الشعر (( comment.message.user.name )) (( comment.message.user.name ))
(( comment.message.text ))
لا يوجد تعليقات.