يالأمعه بسّك من متابع الناس

لـ عبدالعزيز المشعل، ، في غير مُحدد، آخر تحديث

يالأمعه بسّك من متابع الناس - عبدالعزيز المشعل

يالأمعه بسّك من متابع الناس
اتعبت نفسك وانت تركض وراها

هذي تجاذبها على قرع الاجراس
وهذي اتقمصها وتحكي حكاها

وهذي تقلدها من إلباس للباس
وهذي تسايرها على مبتغاها

امرخّصٍ قيمتك من قلة الباس
ماتجني من العالم الا غثاها

ياشيكٍ مجيّر على بنك الافلاس
وبضاعةٍ ما تنفع اللي شرها

متى تحس بقيمتك .. مالك إحساس؟!
إلى متى ونفسك قليلٍ حياها

أصبحت مثل اللي بغى الزين واحتاس
بدال ما يكحّل عيونه عماها

إن طعتني حط القواعد على ساس
وصحح خطا نفسك وخالف هواها

واحرص تعانق طيبة كل نوماس
والرفقه اللي ما تشرف .. بلاها

إما تعيش وسمعتك ترفع الراس
ولاّ حسافة عيشتك في ثراها

© 2024 - موقع الشعر