متابعٍ منهاج جدك

لـ عامر بن نوطان، ، في غير مُحدد، آخر تحديث

متابعٍ منهاج جدك - عامر بن نوطان

يالله يالمطلوب علام الاسرار
لك البقا واللي سوى الله زايل

يالواحد المعبود يالنافع الضار
أدعوك يا معطي العطايا الجزايل

أدعو معي ياللي تصلون الأسحار
جعل أبو خالد ممن طوال المهايل

يا مرحبا يا أعلى مسير وزوار
ياللي لأهل يبرين سقت الرحايل

ترحيبة تاجب على صاحب الدار
تهدي لكساب الثنا والنفايل

يا مرحبا حييت يا نسل الأخيار
بأرض حميتوها بحد السلايل

يا أخوان نوره يا طويلين الأعمار
لكم علينا فضل ولكم جمايل

وانتوا هل الطولات واتنوا هل الكار
وانتوا سندنا في جميع المسايل

عاش الوليد اللي على الشعب مدرار
يمطر كما تمطر حقوق المخايل

سماه يمطر بين درهم ودينار
ومن شاف فعله قال شفت الهوايل

ما سجل التاريخ مثله ولا صار
باليابسه محد فعل ذا الفعايل

يا عل ما تعرض يمينه على النار
يمنى تصافحها عيال الحمايل

يا قف على الاقدام بالليل سهار
يستقبل العالم وياخد رسايل

بالأجر والحسنى جنيت أنت الاثمار
وعلى بني جنسك خذيت الاوايل

للطيب كله حزت يا وافي الاشبار
وخذتي كل دقاقها والجلايل

والناس صوبك وجهت كل الانظار
مثل الحيا لا طاح عقب المحايل

وتناقلت بافعالكم كل الاخبار
بين البشر يضرب بفعلك مثايل

الله يجيرك من صواديف الأقدار
يا با الوفا والجد وأبا الجمايل

من كل فج جاتك الناس عبار
من باب نجران إلى باب حايل

جاتك جميع الخلق من نازح الدار
يبغون مدة جودكم والفضايل

ياللي مشيت وسرت في خير مسيار
رمت الصخي مالك بدرب الهزايل

وبعض الأغنيا حط حراس وحظار
ما يطمعون اللي على الباب سايل

يالنادر الوافي ويا نسل الاحرار
ياللي ذبحت الصيد كله فصايل

ساعدت شعبك يوم غلين الاسعار
وذريتهم من حاميات القوايل

وساعدت عود عاد ورعانه صغار
يمشي بقوم العزم والشد مايل

وساعت مسكين من الحمار ما ثار
وخففت حمله يا صبي الصمايل

وساعدت شياب وساعدت قصار
وعاشت على خيرك بيوت وعوايل

أنتالكريم اللي بك تقال الأشعار
شهادة لله ولها دلايل

كف الندا مداتها سر وجهار
لله ما هو لجل ناس تخايل

متابع منهاج جدك بالآثار
ماشي على ممشى الجدود الاوايل

طلال أبوك مكرم الضيف والجار
وفضايله تشفي الكبود الغلايل

وعبد العزيز اللي وطا كل الاخطار
اللي بسيفه قاصر كل طايل

طاف الجزيرة فوق حسكات الاوبار
حتى غدت مثل الجريد النحايل

وحاز النصر ومن الخصم أدرك الثار
وخذ الحكم وحساب ربعه قلايل

وحما الوطن من كل خاين وغدار
وأمن حدود الدار من كل عايل

وعقب الظلام أشرق سماها بالأنوار
وسحب عن الأشرار كل الفتايل

وصلاة ربي عد همال الامطار
على نبي جا بخير الرسايل

© 2024 - موقع الشعر