المسحوب / إلى بدر بن لوقان

يا ماحلا المسحوب من بين الأوزان
طرق(ن) حروفي فيه تهتف ي محلاه

في جرّته .. اقدر اقول الشعر حان
وفي بحّته .. صدق الأحاسيس تفداه

لا ياعشيري .. والملاعب معك زان
ابداه فيك .. وفيك يازين مبداه

ما أنت الجزل ياعالي الصيت والشان
انت الجزاله بَكبرها ما اتعدّاه

يا ذيب وايل / يابدر يا ابن لوقان
يامن سمو الذات يرقى ب معناه

روس النوايف مالها كود ذيبان
يرقى عليها ويعوّي العز وياه

لك صاحبن لو لانوا الخلق مالان
شرواك في طبعه / وعزّه / ومبداه

لا ضاقت ارضك يحملك فوق الأمتان
وسعادتك .. تبري جروحه وتبراه

لاوي لك ذراع الهزيله والأهوان
وإيدك خشم(ن) ما رضخ لك بممشاه

وزنك إذا شبّهت له قلت : سلطان
يكّرم عن السربوت وزنك ومعناه

ياكم من مهجور وياكم من خان
ما أنت الوحيد اللي عشيقه تخلاه

هذي هي الدنيا وما دام الإنسان
لا من تركها ما أخذ شي ويّاه

الذكر يُنسى مع تكاثيف الأحزان
تحزن عليه سنين وسنين تنساه

مَن الجرد نرجي منشياً وبل الأمزان
ومن الحياه نَموت في طاعة الله