النــدا الأول

لك يا عمر يا بوي مني سلامات
فيها رضاي ودعوة امك غَناتك

تلقى دُموع امك وفيها عَلامات
بتتّهمني إني مسبب شقاتك

يبقى الأمل عندي أشوفك ولا مات
يومن يلومني ويبكن خواتك

الله عطانا اياك من غير منّات
ولا نزال انعيش في ذكرياتك

نبكي على بُعدك ومن غيرك اموات
ارجع لخيمتنا وكَمِّل حياتك

وزّع على اخوانك أمل وابتسامات
ليل ونهار ايقلّدوك ابصفاتك

قفزة أخوك الياس فوق المخدات
حافظ علومٍ كن لا شي فاتك

يا زينها اخلاقه ولا فيه زَلات
من وقفتك ماخذ عزوم وثباتك

ما بيني وبينك تزول المسافات
لو تطلب الروح ارخصت لك وجاتك

مَرَّه بَكَت عيني بكى القلب مرات
من لهفتي يا بوي تعرف غلاتك

نفسي مُنى عيني بهاليله اتبات
جاري بحظن امك وأمِّن مباتك

ملّيت انا من جور بعض الملمات
ما حدٍ يسوي في حياتي سواتك

واشكي المرض يابوي من غير عِلات
خايف من الغُربه تِلوث عَباتك

جاني طبيب وهزني..قال مَوّات
ما يدري ان الروح راحت تلاتك

يهمس بذاني والورق بيده اثبات
لولا عمر ألْحين أبَعْلن وفاتك

ما ينفعك كثر الزعل وانفعالات
الزم سريرك أو توكز عصاتك

ما همني طبٍ ولا همني الذات
همي على مركب يأمن نجاتك

يشهد علي الله ما قلت الك هات
وصيتني بامك وحافظ وصاتك

ما ودنا قصور وعمار وبنايات
إرجع وبايعلك هُدومي فداتك

ظلِّيت انا وَصّي لقيت الوقت فات
لوفاتك إحذر لا تفوتك صَلاتك