الودااااع

الامر لله يا هل العقل والشور
والصبر تاج وما على التاج عذروب

ومقسوم قلبك..لازم يعانق النور
يمسي جلي في حزّته دوم مطلوب

ونا غدا بي سيّد الريم بالبور
من عقب ماهي معانقه صارت اكروب

جاني..وقلبه يحتفي بضيق وكدور
جاني..بجوفه كله انقاض وحروب

قال..الوداع...وللقدر فعل ما مور
تفتش صروف الوقت في عشقي ادروب

ارخى اللثام ومدّ لي عقد بلّور
عانق يدي وارخى الهدب حيل مصيوب

قال..الوداعه..وأنهر الهم والجور
دعها حبيسه بداخلك ذِكر رعبوب

هذا النصيب..وللشقا عمر ودهور
تطغى متونه فوق هامات وقلوب

قلت..الغلا..ماهو من الشوق معذور
انته..سنين العمر..والعمر محسوب

ولآني ..بعدك اللي مع الناس مذكور
يموت شيخ وينهدم خدْر مسلوب

قال..الله أقوى خلّني عشق مستور
اللي بقى جسم(ن) من الحزن منهوب

ورحله بلا عنوان وجناح مكسور
ودّعتك الله...فوقنا حكم مكتوب

ثم استدار وجوّد المشي مقهور
أقفى تمامه واسدل الحسن فغروب

اقفى ونا في سجّتي بقلب مفطور
خلّف غصون العشق في عذر منكوب

ونا على صدر العزى دوم مجبور
ابقى وثيق الصبر بالشكر منصوب

للّي يعيد السير من دفنة اقبور
منزل غمام الخير للناس مصبوب