المطاليق

لاهان قلب(ن) جمّله فعل راعيه
يقنى من الجزلات ما يرفع الراس

يفيض عزّ وصافي الطيب ساقيه
بياض وجه وللمطاليق نوماس

شكالة الذرب اللي ما خاب راجيه
هذي فعايل والبشر جمع واجناس

حيّ(ن) حيا بالدين والرب كافيه
ما تلحقه نغزات مرهين الافلاس

ما غرّه الغاوي ولا صوت داعيه
ولا طاح قلبه في مرابيض الاتعاس

وحيّ(ن) يروغ وفاضح العيب شاريه
تفخر مخابيه ابمفاتيح الادناس

ما جا على وضح النقا وخاف باريه
عليه من رسّ الشياطين خنّاس

وحيّ(ن) على الليل إبتلا في غداريه
يستر لهاته قبل متخيلها الناس

له حاجة(ن) بالوقت والضيق كاويه
يسكت ولا يدرج لمكنونه انفاس

واليا سألته ما فتش باب خافيه
يعطيك علم(ن) عكس ما جا بالاحساس

وكم نادر(ن) يحفظ له الوقت طاريه
متواتر(ن) بالطيب في بطن قرطاس

وكم من صبوح(ن) ما بلغ ريق باغيه
دونه تحول اللي على قبّ الافراس

وكم من رواق(ن) ماستر وجه بانيه
الشِق شقه لكن النذل عساس

والجمر ما يحرق سوى رجل واطيه
واللي معافا يعتبر من هل الباس

والعمر لوطوّل ترا الموت قافيه
يلجّ في وقته كما لجّ الاجراس