الهنوف

الهنوف اللي نحى قلبي جهتها
في حراوي وصلها صدري وسيعي.

علموها دام عيني مانستها
لا تهملني ولا تنسى صنيعي.

ضعت من خرس العيون وسلهمتها
واحسب ان اللي سواتي مايضيعي.

اتركتني من جفاها وغنجتها
للهموم ودمعة الطفل الرضيعي.

فارعً بالحسن تعرف ماركتها
من شراها بالمحبه مايبيعي.

ماينافس خصرها غير ارقبتها
فارقه بالوصف والزين الطبيعي.

من دلعها ماتكمّل سالفتها
تكسر الاحرف ماتنطقها جميعي.

ولا مشت صار التراب اللي تحتها
روضتن بالورد وزهور الربيعي.

وكنها لا عرضت لك بطخمتها
بكرتن من وضح حثلان السبيعي.