الطرف الكحيل

ازهم احروف المعاني لوصفك يالجميل
واحتري هجسٍ تداحم ورى ابوابها

شاعرك جزل القصايد ولا يرضى الهزيل
كل بيتٍ بالقصيده يمس اطنابها

هاضني ممشاك بالدرب ياضاف الجديل
مانلوم الناس يمك تعوج ارقابها

النقاب اللي على الوجه يالطرف الكحيل
يبرز العينين ويشدني لهدابها

شفتني وارديتني بالهدب دونك قتيل
في عيونك جيش قومٍ تحث اركابها

ذي عباتك هبه الريح واعيوني تخيل
ضقت فالدنيا وانا في وسيع ارحابها

جيتلك والنفس كالقوم لاجاها دخيل
ورحت منك والحرايب نحسب حسابها

ياجميل الوصف ياعود ريانن يميل
نسمة الغربي تلاعبك مع هبهابها