دارنا وشيوخنا

يادارنا دار الكويت وديرة ابناء الصباح
دارٍ بحكم شيوخنا دايم رفيعٍ شانها

دارٍ مشينا في ثراها واحتزمنا بالسلاح
وانا احمد الله عن بلا الحساد ربي صانها

حنا ذرانا شيوخنا من طيبها تبرى الجراح
اخوان مريم عزوة الشيبان مع شبانها

اهل الكرم واهل الوفا يشدون هبهاب الرياح
لاهبة الارياح ساقة خيرها لوطانها

مزنٍ ترادم مع هبوب الريح والبراق لاح
أليا هطل هتانها خيرٍ سقى شعبانها

عسى يساقيه المطر أليا انهمر مثل القراح
تروي معاطيش الاراضي تمتلي وديانها

وعسى يدوم الخير دام الدار قايدها صباح
مدة بوناصر رجحت كف الكرم ميزانها

حنا لبو ناصر جيوش ودرع وطيور الفلاح
ماهمنا جيوش العدا لاجت ندك اركانها

لاثارة الهيجا دحمنا الضد بسيوف ورماح
واخيولنا يوم الوعد نطلق جميع اعنانها

يشهد لنا التاريخ في تالي زمان الانفتاح
مجدٍ يخلد لو مضت ايامنا وازمانها

اروحنا فدا الوطن وشيوخنا رمز الكفاح
واكفوفهم دايم نديه نفتخر بحسانها

وكويتنا دار المحبه والوفا والانشراح
والعز من ربي حماها وذل كل عدوانها

وعسى الولي من مد جوده يضفي الخير المباح
ويطول بمعمر الصباح اللي رفيعٍ شانها