يا دارنا.. لا ترهبي.. يومك سعيد

يا دارنا.. لا ترهبي.. يومك سعيد
حنا حماة الدار.. أوشب أشعالها

هذه عنيزة.. ما نبيعه.. بالزهيد
لي فرعن البيض.. نحمي جالها

دونك ودون الغين.. مخضر الجريد
نروي.. من الضد الحريب.. اسلالها

ياما ذبحنا.. دون غضات تميد
جنايز ترمى.. ولا أحد شالها

يا شيخ.. ياللي.. ما نشا مثلك وليد
لي رفعن الخيل.. شهب أذيالها

لو جبت: عناز.. وشمر.. والرشيد
ونجد جميعه.. دقها وجلالها

جبته وخليته كما حلقة حديد
شرق.. وجنوب.. وغربها.. وشمالها

الدار دونه.. لابة.. تحمي الطريد
صعب على كل العدى.. منالها

كم سابق.. يوم اللقا.. جريه يزيد
عاداتنا ضربه . وضرب أمثالها

تاطا حديد، وفوق راكبها.. حديد
توطته.. مركوبته.. بنعالها

عينت . وين الجرو.. تكفي لا تحيد
لي لي.. تعشته الضرا.. وعيالها

ولاشيخ مثلك.. ما يحايد.. من بعيد
يقلط على العقدة.. يهد اجدارها

لي بندق.. ترمي اللحم.. لو هو بعيد
ما وقفت بالسوق.. مع دلالها

خماس رصاصه.. ستة أشبار تزيد
ملح الجريف.. امحيل.. يعبا لها

ربعي.. هل الطولات.. والباس الشديد
خطر عزايمها.. تهد جبالها

أولاد علي.. هم عمي عين الضديد
عقالها.. يوم الوغى.. جهالها

وإن كان تبغي الحكم.. فالرأي السديد
إدحم على الديرة.. وخضب جالها

قطع النخل.. ما هو بعيب.. والوقيد
العيب.. باللي ما ينم أقوالها

والله يجازي.. كل جبار عنيد
منا.. ومنكم يوم عرض أعمالها