آه من همٍ سكنّي

عادة أيامي عنيدة ما عطتني ما أبي
.............. وعادتي أصبر عليها لين تعطيني أمر
 
مرّت أيامي أصارع ما تحطّم منكبي
.............رغم ما شفت ف حياتي من دروس ومن عِبَر
 
والله إن الوقت جاير في تصاريفه غبي
............. دام صار الوقت ضدّي ما ينجّيني حذر
 
تركض همومي سبوقه والهنا يَحْبي حَبِي
.............. دايم أخسر في حروبي عمر قلبي ما ظفر
 
كل ما فجري بدالي اختفي في مغربي
........... غارق ب خوف الظلام وما يضوّي لي قمر
 
ما أقول إني ملاك ولا أقول إني نَبِي
........... ولا أقول أبغى حياتي ينجلي منها الكدر
 
لكن أوقاتي تساوت بعد فقدك يالظبي
...........صح ما أقوى غيابك بس ذا حكم القدر
 
دوم تبعدك الليالي لا دعيتك تقربي
............ آآآه .. من همٍ سكنّي كل ما أكبر كبر
 
من معاناتي تغذّي ومن جروحي أشربي
........... أكتبي فصل النهاية وانثري دمي حبر