ذكريات

نسايم صيف هزتني وضوت شمعة الأفكار
تذكرني بزمان أول ، وذاك البيت وجدودة

تذكرني بروايح هيل ، تعطر كل زوايا الدار
وحنا صغار تجمعنا ، سوالف أمنا العودة

كان الحوش يترقب ، وينطر جّية الزوار
كان القلب ما يحمل ، غير أحلام محدودة

كانت سدرة الفرحة ، تظللنا وحنا صغاروي
تخلي كل أمل أخضر ، يتمايل على عوده

وكنا أثنين نتعشق ، نتعاتب ، نخش أسرار
نروي للهوى قصة ، عمرها أيام معدوده

كانت نظرتك تجرح ، تداوي وتشب النار
تخلي قلبي لصغّير ، يعزف لك وتر عوده

صارت فرحة أفادي ، أغاني للهوى وأشعار
تفضح لهفة العاشق ، وتسقي الحب ووروده

أذكر ضحكة عيونك إذا سفّر قمرها وغار
تفتح للفرح فيني ، كثير أبواب مردوده

وين الحب وأحبابه ، وين الليل والسمار
وين عيون تتريا ، ربيع الحب ووعوده

وين الّلي ملك قلبي ، وودعني بدون أعذار
وخلى كل فرح عمري ، يصير أحلام مهدوده

ما أقدر على الذكرى إذا نسنس هوايا ودار
يذكرني بروايحكم ، وريحة بيت وعهوده

صار الوقت يجرحنا ، ويجرح صورة التذكار
راح الحب ما ظلت ، غير أيامنا السوده