حزني والمشاعر....! - احمد الخالدي

يا صاحبي والحال من دون في دون
ودموع عيني كالسحايب هميه

مجنون لا والله ماني بمجنون
مير البلا ظيقي تمادى عليه

أسهر طوال الليل يا صاح محزون
مجروح وجروحي بقلبي دميه

أسباب منهو بالحشا ركز طعون
من زود ما حبه حياتي شقيه

أشتاق في بعده وتشتاق العيون
ظمة حبيب الروح طيفه شويه

مانام ليلي بالهواجيس مغبون
كن الجروح ارواح والروح حيه

ياليتها تدري بحالي وتدرون
الكل يشكي في ظلوعي عليه

صرت الغريب اللي مسافر وتوحون
فارس وحزني والمشاعر مطيه

وش عاد لو جابوا ثلاثين مليون
وقالوا تخير قلت ما فيه زيه

عذال قلبي لو بغيتوا تهرجون
ما فيكم اللي شد فكري شويه

ياللي بحب (الريم) قلبي تلومون
خلوه قلبي في عذابه وكيه

مجنون وادري زود بالزود مجنون
والظيق متمادي عن اول عليه

شاعر نسجت القاف لرضاه ويهون
ما دون (( قلب الريم )) عندي سويه

احمد عبدالله الرطبي الخالدي
© 2024 - موقع الشعر