بنت شبه الجزيرة

وقّف دقيقة وإلزم الصمت للقاف
وأقرا سيوف(ن) للمعاني شطيره

من شاعر(ن) شعره على المجد نيّاف
يقرض شعر ماهوب يقرض شعيره

وقت اللوازم لأعتلى المجد ميقاف
ياقف على راس الهرم دون غيره

وإن كان بيّن شاعر(ن) طبعه خلاف
يكسر ظهر شعره ويدفن غديره

قال الذي للشعر مركب ومجداف
دايم يخوض بحور شعر(ن) غزيره

ياللي خذيت من الردى ستر ولحاف
وخيّبت ظنّ الشعر في كل ديره

تمدح بنات(ن) ماعليهن تحسّاف
وتشتم بنات اهل الوفاء والستيره

ماتدري إن لمياء وتغريد وألطاف
ماشاقهن غير الذنوب الخطيره

وماتدري إن لمياء وتغريد وألطاف
ماهمّهن غير الجيوب العميره

وماتدري إن لمياء وتغريد وألطاف
يبغون قرب اللّي موداع ضميره

عملة رخيصه مالقت كود صرّاف
إلاّ اللّي مثلك ضايع(ن) في مسيره

تصيح بأعلى الصوت وتقول عرّاف
إمحق معرفه جعلها في دميره

العرف والله عند من روحه تخاف
من خالق(ن) يعلم بخافي سريره

اللّي إذا قالوا للأخلاق وصّاف
قال الستر كلّه لبنت العشيره

واللّي إذا قالوا ترى الزين ينشاف
قال الحلا في بنت شبه الجزيره

وإلاّ انت ياللّي تدّعي حكم الانصاف
وتردّ نفسك للامور الصغيره

إن طعتني خلّ الشعر لأهل الأعراف
مادمت ناقص دين وأعمى بصيره