أكابر بشوقي - مشاري البابطين

عمرك سمعت القلب بأحزان يدعيك
عمرك سمعت إنّ الحنايا تحرّاك

عمرك سمعت إنّ القصايد تناديك
عمرك سمعت إنّ الورق عاش فرقاك

أكابر بشوقي على شان ماأطريك
وأكابر بشعري على شان ماأقراك

وأكابر بدمعي على شان ماأبكيك
وعيّا المكابر لايخلّيني انساك

مركب غرام ولارسى في شواطيك
وغيري مراكب قامت تطوف ميناك

شفتك تقهويني الخيانه بأياديك
ماقلت لك تكرم وتسلم وعافاك

أبيك تعرف وش نهاية تماديك
وأبيك تعرف وش جنيته بيمناك

أخترت درب(ن) للتجّافي يوّديك
مسك الختام أقفيت والغدر خاواك

يالله بسيطه دام هذي تواليك
ماصنت قلب(ن) صانك وعاف فرقاك

ياقلبي لاتزعل على فقد غاليك
وياعين جفّي دمعك إليا من أرواك

وياشعري لاتبكي عليهم قوافيك
خلّ البكاء لليّ تناسا وخلاّك

خابرك ياشعري بعيده مساريك
ماجت على خلّ(ن) نوى اليوم يجفاك

تعليقات الزوار

  • كُل المحتوي و التعليقات المنشورة تعبر عن رأي كتّابها ولا تعبر بالضرورة عن رأي موقع الشعر.
  • بعض صور الشعراء و الشاعرات غير صحيحة، نرجو تبليغنا إن واجهت هذى المشكلة
  • إدارة موقع الشعر لا تتابع التعليقات المنشورة او تقوم بالرد عليها إلاّ نادراً.
  • للتواصل مع ادارة موقع الشعر إضغط هنا.
© 2021 - موقع الشعر