يانجد جيتك أشتكي مرّ الايام

يانجد جيتك اشتكي مرّ الايام
وجروح حزني في خفوقي مقيمه

جيتك وقلبي من عنا الوقت منضام
جيتك ألملم بك جروح(ن) أليمه

الحزن في قلبي بدا يعتم إعتام
والهمّ شكّل في سما الصدر غيمه

الوقت قاسي والعمر عدّة اعوام
والفعل وافي والنوايا سليمه

مااصعب من الرجّال لاصار عزّّّّّّّّام
وتصدّه ظروف الزمان بظليمه

الموت لامن طاح والموت لاقام
في كل حالاته عواقب وخيمه

وش قيمة الرجّال لاصار مقدام
في وقت ماتفرق رجاله حريمه

روّح زمان رجال ذيب(ن) وضرغام
وجانا زمان رجال خبل وهليمه

ضاعوا ورى الشهوات قدّام قدّام
وصار الوفاء للدّين دقّه قديمه

بعد(ن) عن الخيرات سعي(ن) ورى آثام
الله واكبر يالقلوب السقيمه

ذنوب وعقّ لوالد وقطع ارحام
وماعاد للاخلاق معنى وقيمه

ينام صوت الحق والظلم مانام
وماشوف لاعراض الاوادم حشيمه

يالله ياللي كافل(ن) رزق الايتام
يارازق(ن) كل الكفوف الكريمه

ترفع بفضلك كل راية للاسلام
وتذلّ في عزك نوايا عقيمه