حبيبي أقسـم انـك داخلـي وتعيـش بالأعمـاق

حبيبي لاتقول اني نسيتك أو نويت فراق
ومسكنك بسواد عيوني اللي دوم سهرانه

حبيبي طيفك يزاهي الصبح بالنور والاشراق
ويجلا بنوره الليل وتشاعق فيه ضيَّانه

حبيبي لك مكان بخافقي وتزيِّنه الاشواق
وماغيرك سكن قلبي جرى في وسط شريانه

حبيبي ماحدٍ غيرك تمنيته على الاطلاق
ولاقبلك عطيت احد ٍ كلام السر وآمانه

حبيبي لاانحرم من شوفتك فرقاك ماتنطاق
و يالله يحرم اللي منك يحرمني من اخوانه

حبيبي ان كان قلبك مثل قلبي مهتوي مشتاق
أعطني ضحكتك عندي لها معنى وفتَّانه

حبيبي وش تبي غير القسم ياقمة الأخلاق
وأقسم لك بربي ورب كل الخلق سبحانه

حبيبي أقسم انك داخلي وتعيش بالأعماق
وأنت القلب وانت الروح وانت الماس والدانه

حبيبي لو تجمَّع كل احاسيس وهوى العشَّاق
وتوزن ماسوت حبي ولامالت بميزانه

حبيبي لاتقول اني أبالغ في الهوى منساق
ومسموح ٍ تقول اللي بقلبه قاله لسانه

حبيبي أنت مثل صبيِّ عيني بيننا ميثاق
ولابعتك ومنهو اللي يبيع وينكر اوطانه

حبيبي أنت مثل الروح ويشهد ربي الخلاَّق
ولا اغلي مثلك احدٍ في الخلايق انسه وجانه

حبيبي لامن احيا وخالت المزن وبرق برَّاق
أحس انك لفيت يفز قلبي تجلي احزانه

حبيبي لو نويت البعد فاذكر دمعي الرقراق
ولا لي في الفراق وما احتمل فرقاك واشجانه

حبيبي اصخف لقلبي تراه بحاجة الاشفاق
ومثلك مايليق ابه القسا بربعه وخلانه

حبيبي احفظ العهد اذكر انك معطي الميثاق
ومن يعطي عهود ٍ لزم يوفي يبر بايمانه

حبيبي أنت آخر ساحل ومينا ومرسى ً لاق
أبطوي شراع مركب حبي وبرسي بشطّانه