يمّه عسى ملفاك في دار الابرار

علم ٍ لفاني يوم الاثنين مشهور
قالو تحضّرللسفرقلت وش صار

قالو تبيحك أمّك وصرت مكدور
لاني عرفت ان عقبها بتظلم الدار

دنياي صارت كنّها تلفّ وتدور
حسيّت كنّ البيت من فوقي انهار

يادار وين اللي معي عدّة دهور
تدعي لي الله بالتهجد والاسحار

يا دار وين اللي لمن جيت مقهور
تضمّني في صدرها الوافي البار

قالو تصبّر وانت ذا اليوم ماجور
حكم القدريمضي على صغار وكبار

هلّت دموعي واحفر القبر مجبور
دموع رحمه مؤمن بحكم الاقدار

آمنت باللي منزل ٍ قاف والطور
سبحانه المعبود عالم بالاسرار

الله يبيحك يمّه ومنزلك نور
يمّه عسى ملفاك في دار الابرار

يرحمك ربٍّي جابر ٍ زلّ وعثور
يالله عسى مسكنك جنّات وانهار

يكسيك ربي زينة الخلد والحور
الله كريم ويكرم النّاس الاخيار

يالله عسى قبرك يمدّد له بنور
لك اللّحد يفسح على مدّ الابصار

والله يعظّم اجري ويجبر اكسور
في خاطري المحزون لصار محتار