من مين ولمين - باسم عبدالحكيم عيد

احدى قصائد ديوان القلب العطشان لمؤسسة القلم العربى للنشر والتوزيع
من مين ولمين
ورق الجرانين
دم العصافير
قلق الحيرانين
ترس الإنسان
مكسور لكن بيدور
والفجر أمان
لاح وبان
محفوظة تفاصيل المكان
راسك رجليك
الناس من حوليك
أرضك مش ليك
لا ليك ولا عليك
قوم فك ايدك
واربط راسك
وعيش يومك وسط ناسك
منديل الشمس أبو المناديل
حاضن قمرة محنية المواويل
فى زمان الديل
الراسل ليك
الحط .. الشيل .. الشط السيل
العذاب .. الويل
الحيل مهدود
متنى ومفرود
آخر العنقود
مخلوق مزنزق
ملزوق ع الحيط
بانى البيت
مطلوب فى الغيط
غرقان فى البير
والبير ده غويط
مشنوق بحبال لعب وتنطيط
يا فراش طيار
حولين النار
لوجة شخابيط
ألوان الزيت
ألوان مية
ألفين مية
فى لوحة الأحزان
اقرا المكتوب
انا قلبى يدوب
يعرف يقرا
دا انا كل ما أعدى
الدحديرة بانزل نقرة
فقرا وعايشين
حشين مصارين
قلبك يا زمان
خوان خلتنا نحب نخون
راسمين ع اليوم صبر الصوم
روحنا جينا
جينا روحنا
قلب الأزهار
موجوع مخدوع
يا جموع ماسكة فى اييديها
الشخاليل .. تصفيق .. تطبيل
من مين ولمين
ورق الجرانين
للشاعر العربى
باسم عبدالحكيم عيد
© 2024 - موقع الشعر