تعالي

ثلاث ايام من حل الفراق ولابقى بي بأس
صبرت ولانفع صبري وأشوف الموت أشوى لي
 
تعالي..وأوقدي برد الضلوع بدافي الأنفاس
تعالي..وأحضنيني مابقى لي عقبك الوالي
 
تعالي..وأرسمي بسمة فرح في حالي المحتاس
تعالي..من نظر في حالتي عقبك تعزوى لي
 
تعالي ياشقى عمر الحزين..المولع..الحساس
تعالي يانفس صدر القصيد اللي شكى حالي
 
تعالي..بللي عقب الوصال عروقي اليباس
تعالي..لاتشيلين الزعل في صدرك الخالي
 
( ترى عمر الزعل ماكان عذر لقسوة الاحساس
انا أدعس بالغلا خشم الزعل لأجل أرضي الغالي )
 
بكيت ولانفع دمعي..حنيت من الفراق الرأس
طلبت الحظ يرجع يبتسم ويجيبك قبالي
 
أبنسى صورتك لكن أشوفك في وجيه الناس
أصد عن البشر خوف أذكرك..وتجين في بالي
 
نهاية عمري الليله..مع الحبر ومع القرطاس
أموتك في نهايات الطريق ..لحالي ..لحالي