ليلة رحيلي

يا حبيبي خافقي ما هو حديد
خافقي ما عاد يقوى خنجرك

وش تقول بعاشقٍ حبه أكيد
كنّه الطفل اللي توّه ما دَرَك

كان ينطر منك لو حبٍ زهيد
لكن عزوفك على صدره بَرَك

ودّيّ ارحل قبل ما شوف المزيد
ودّيّ بليلة رحيلي أشكرك

إكتشفت الحب قربك ما يفيد
لو يفيد/ اشلون اجازف واخسرك؟

لا تظن البعد عنّك يوم عيد
لا وربي/ إستحالة .. أقهرك

الهوى لازال في طبعه عنيد
ما خلق بقلوبنا شي مُشترك

ما قويت احيا مع رياح الجليد
ولا قويت اني أخوض المُعترَك!

والله انّي راحل وماني سعيد
ما حظيت بفرصةٍ لجل اعذرك!

بس يكفيني أحبك من بعيد
دام قُربي (للأسف) .. يتعذّرك

مو غريب انّ (المحبة) لك تزيد
كلّ ما شفت (الندم) يستحضرك

يا عذاب الروح يالحب الوحيد
لك بقى عندي سؤالٍ يبهرك

لو يعود الماضيّ بجدّ وجديد
يا ترى تتوقع انّي أهجرك؟!