سلام يابوجود مليون مره

مساجله
قصيدة الشاعر

محمد عنيز الحربي
سلام ياابو جود مليون مره

ولايكفي المليون في ضرب مليون
أعداد نبت الارض وادي وحره

وأعداد من طافوا في بيته يلبون
ياحمود في كثر المواصل مسره

مير العرب ياحمود ماعاد يدرون
كلن مقفي بين خيره وشره

والوقت يسرقهم تقل مايشوفون
ضاعت علي انجوم وسط المجره

كانوا عليها البدو ياحمود يسرون
اللي يجيب اعلومها لي دره

له جايزه مع اول اللي يفوزن
وانا على الطيب تراي اتشره

إمايدق الباب ولاتلافون
رد حمود الجابري

يامرحبا بأهل القصيد ومقره
اللي مع الجزلات وافي ومقرون

إعداد ماخطت على الأرض جره
وإعداد من وسط المساجد يصلون

بلي يمد الطيب واللي يذره
مواقفه يبلشبها اللي يعدون

ويابن عنيز الوصل ماله مضره
ماتنقص اللي للنشاما يمرون

مير الزمن بحره وجوه وبره
يمشي على ماقيل من دون في دون

الفكر لو يأخذ على الوضع فره
نلقى العجب والفرق بالشكل واللون

الماضي اللي فات لله دره
والحاضر الله يصلح الحال والشؤون

ولو غاب نجمن مامشى في ممره
تكفي نجومن قدرها قدر موزون

الطيب باقي والردى بالمدره
والبيت له ذريات وسطه يذرون

الوقت واحد ماتغير مجره
مير البلا بالناس ظاهر ومضمون

وكلن يابو تركي يجود مغره
النادر النادر على مايقولون

وإن كان تشره لو مثقال ذره
لو بوفي المكيال ماني بممنون

حقن عليه بالوفاء والمبره
لك قدر من بين المعاليق مكنون.

نوفي مع الوافي نجيه ونمره
بين العرب من ماضي الوقت قانون

والبعد عذر اللي عن الدار بره
ومثلك على شرواه لازم يعذرون.

ولا انت وصلك حق لازم نقره
والحق مايخفى رياجيل يدرون