من يفعل الطيب مايندم

من لا خدم لو يطول الوقت مايخدم
يعيش عمره وهو ما قِضْيَ له حاجه

كل يجازا بفعله مثل ما قدم
والشخص يعرف اسلوبه من تهراجه

بالناس متوخر وبالناس متقدم
ومن ضاع في مدخله ما دل مخراجه

لولا النفوس الشريرة ما حد(ن) يعدم
ولا جهل راعي المنهاج منهاجه

من يفعل الطيب بأهل الطيب مايندم
يرصد رصيد يفيدة كل ما حتاجه

بيت الشرف لو يطول الوقت مايهدم
بيبانه مشّرعه ما قفل مزلاجه