الثريا - عبدالكريم الحارثي

يا ليت صوتي يوم اغنيه مسموع
و ام الثريا تفهمه من تنهاته

وتعرف سبب مغناي وصياح الضلوع
وتشوف وش يشغل قليبي بدقاته

للثريا من غلا في حناياي مزروع
اخفيت زرعه لجلها بين طيّاته

على شان ما تشره على القلب وتلوع
بفتح خفوقي لجل تعرف هواياته

هذا غلا بنتش من الله مشروع
لا توجعين القلب تكفيش نياته

ويكفيش كرسيها وضعناه مرفوع
في قمة قليبي توسع مساحاته

ويا ليت شعري لو كتبناه مربوع
ينال شطره شدة إعجاب مولاته

حلفت انا و الله ما نيب مقروع
عن صوغ شعري فيش يااجمل عباراته

و لو بغيتي الدرب لرضاش مطبوع
بحروف من الماس تفداش حبكاته

ذخري هجوسي ما رجا الغير مقطوع
واثق عليه يصوغ آلاف بأبياته

شفتي هجوسي كيف ارخى لش الطوع
وغيرش تمنى حرف ما نال منياته

انتي حلا شعري ويا حرفي الدلوع
اللي من اتوحاه ما خاب بأنصاته

يا زينة الدنيا ويا زبدة الموضوع
اللي شغل قلبي من اول بداياته

يا تاج كسرى والذهب فيه مجموع
وياهيبة السلطان في كل وقفاته

يا تحفتن ما رجّها مليار مدفوع
من زينها الهامور ضحّى بسلعاته

يا شي بعيون الملا يشبه الجوع
من عاش من دونه تنبى نهاياته

بالمختصر يافدوة الشاعر المخدوع
قلبي فدا عينيش روفي بنبضاته

لو عاش هو حقش ولاهوب مرجوع
وان مات قولي فوق قبره تحياته

هذي القصيدة لش من انسان ملذوع
عسا حروفه نالت إعجاب مولاته

© 2024 - موقع الشعر