مدري يجيلك قصيدي - عبدالكريم الحارثي

نعاس مدري هو يجيلك قصيدي
اللي كتبته فيك يا اجمل قصيدة

ان كان ما يوصل فتامر ياسيدي
يطوع هاجس فيك صاغ الفريدة

بعطيك من فكري حلايا نشيدي
واجيب لعيونك معاني جديدة

بكتب قصيد يذوب منه الحديدي
باحساس قلب(ن) منك ناره وقيده

واعيش باقي العمر كاتب بايدي
عن حبك اللي في ضميري احيده

حب(ن)لك الله كل لحظه يزيدي
مايعرف الر حمه علي جار كيده

راسي كما ترسي رواسي الحيودي
ما هزته عذال عجزت تصيده

مقساك ياللي في جمالك فريدي
يومك حرمت العين جرعه مفيده

شوفك دوا فعال فعله مديدي
يرتاح لا ذاقه عشيق العنيده

فيك الدلع والغنج مكن قيودي
يا راس مال اللي مصفر رصيده

شوقي على شوفتك وانعش وريدي
واضمك بصدري واشف المكيده

واذوق من ريق(ن) لجرحي مفيدي
طعمه دوا للي بلهفه يريده

اقفيت واقفى الفرح مني وسعدي
دمي جمد بالعرق واتلف وريده

بكيت عين(ن) كنت فيها وحيدي
واتعبت من يمسح دموعك بإيده

ومهما عطاك الوقت وجه(ن) عنيدي
تبقا بوسط القلب ذكرى مجيده

وتبقى فعيني بالغلا مستبيدي
وتبقى طيوفك في خيالي عديده

اما عن النسيان علمي اكيدي
منساك دام القلب نبضه يعيده

يا سيدي ارجو بتحرير قيدي
فالعظم يشكو قوة اقفال قيده

نعاس مدري هو يجيلك قصيدي
وان كان ما يوصل ترا ذي جديده

© 2024 - موقع الشعر