غروب المشاعر - سعيد الشواطي

ياغروب المشاعر في حياة العشيق
صرتي آخر كيان الصدق وأنا اوله

أرحلي معتمه لو كان باقي بريق
وأعرفي انك سكنتي خانة (ن)مهمله

ما خذيتي معك ياكون هم وضيق
وما ترك ودك الا الصدق يامذهله

لو يهمك شعور اللي من اجلك غريق
قولي انه غرامك من بعد مقتله

لان كل(ن)نصح قلبه وعيا يفيق
عن غرامك وخاف الناس لا تعذله

فاحفظي سر حبه من عدو وصديق
وأبدي الحزن بعده وأخري الهجوله

قولي انك حزينه وأن جرحك عميق
أكذبي قولي انك تعشقين بوله

دافعي عن عشيقك واذكري ما يليق
خلي الناس تاخذ من وفاه أمثله

ولا اقول اكتبي ياناس كلن يفيق
كيف يوفي لقلبك من يخون بهله

خايف أوهق العشاق في ذا الطريق
وانكشف للبشر وأصير انا المهزله

ما ابي الذنب يسكن خافق ما يطيق
غير ذنبه وذنب الناس وش يحمله

© 2024 - موقع الشعر