ذبل غصن الوفا

أنا قصرت يومنك تجافيني بلا أسباب ؟
ثمان سنين ماشفتك ولاوصْلت مراسيلك !

تعب قلبي يناديلك .. يجي من آخره طَلاب
ويرجع قبل لايشفي غليل الشوق .. يحكيلك

عن الدنيا بَلا حِسّك .. بَلاحتى .. كلام عتاب
يجيني تسبقه بسمة شفاتك قبل تحليلك

وقف كل الحكي يومي لمحتك صفحةٍ بكتاب
تَحَتْ زين المعاني صورتك بآخر مداهيلك

ذكرتك .. وانتثر دمعي ألم .. وابتلّت آلاهداب
وضاقت بي مدينة مافْتَحَتْ درب لمواصيلك

شرقتك عبرةٍ مُرة ..كِما طفلٍ وسَط أغراب
جلس مذعور مايدري يجيهم والا يَحْبِي لك

ذبل غصن الوفا يرجي وصالك والمطر سكّاب
يبي منك تجي ترويه .. والا بروحه يآتي لك

ضمِيتك .. لين ماتت بي عروقي والعطش غلاب
ولاني قادره اتحمل حنيني يوم أغني لك :

ألا ياكبر همي كل مايِطرَق لذكرك باب
والا ياكبر حسراتي إذا طفّوا قناديلك

من أول ما أمر ربي وجاء يومك وأنا منصاب
خذاك بعيد عن عيني وجفّت بي مناهيلك