لاح برق المفارق - وسمي العبيان

رافقتك السلامه حان وقت الرحيل
لاح برق المفارق يالغلا في سماك

العذر والندامه ماتفيد العليل
للاسف ماتطيب خاطر اللي رعاك

اترك الحب دامك بالمحبه بخيل
كيف طاوعك قلبك تخسر اللي شراك

كنت راضي بقربك لو وصالك قليل
وكنت راضي بحبك لو غرامك هلاك

كنت اشوفك بعيني شخص ماله مثيل
ما اشوف الخيانه واحسب انك ملاك

لانعمى القلب تعمى العين واكبر دليل
شوف حبك عمى عيني عن اكبر خطاك

شوف حالك بدونى لا ترد الجميل
ماحسبت الخساير يوم قلبي معاك

وسط حدب الضلوع العوج مالك حصيل
مات زرعن غرسته من سبايب جفاك

رح وجعلك تلاقي بالليالي بديل
تهتني في غرامه ويهتني في هواك

© 2024 - موقع الشعر