وجه الحزن

مايغيب النجم لكن تحجبه شمس النهار
القمر لولا مغيب الشمس ماشفته ظهر

كل شين بالفلك يمشي على حسب المسار
معجزات الرب ماهى من تصاميم البشر

الكواكب بالفضا تسبح على خط ومدار
والمطر يسقي بقاع الارض من بر وبحر

يروي الارض الحزينه عقب طول الانتظار
يبتهج منه ابدوياً كان طاويه الدهر

الغلا لا من تمكن بالحشا دون اختيار
يجبر القلب الشقاوي يسلك دروب الخطر

والنصر عقب الهزيمه ينحسب رد اعتبار
من رضى بالذل ماله بالزمن عز وقدر

انكشف وجه الحزن من عقب ماطاح الستار
وضاقت الارض الوسيعه وصبحت مثل الجمر

الليالي اخذلتنى واشعلت بالصدر نار
مارحمت نفسن طواها الهم واشقاها السهر

ماقويت اصبر وغاب العقل من راسي وطار
وامحلت كل الاراضي عقب ماكانت زهر

اظلم الكون بعيوني والزمن عاند وجار
ابتعدنا والقلوب ابوسطها هم وكدر

جاء يوادعنى ولكن انهمل دمعه وثار
سيطر الصمت ودموعه كنها مجرى نهر

ماقدر ينطق بكلمه ثم لوح واستدار
عيت ارجوله تشيله طاح من ضيم القهر

لحظتن فيها بعيني شفت معنى الانكسار
انتثر دمع المحاجر مابقا عندى صبر

الامر لو هو بيديني ماحصل ذاك القرار
قدر الله والقدر مكتوب مامنه مفر