خط أشنبة. لـ سعد الأدهم

خط أشنبة - سعد الأدهم

ماكل من خط أشنبة صار رجال
وفتل الشوارب ماتخص الرجاجيل
 
وكان الرجوله بشت او ثوب وعقال
لبسو بشوت السفه والمهابيل
 
ماهي ترى في كثرة الجاه والمال
والاهي ترى في صف كثر المعاميل
 
هي مكسب للشخص في طيب الافعال
يكسب بها مدح العرب والأقاويل
 
يضرب بهم عند العرب كثر الامثال
وتبقى مع الأجيال جيلا ورى جيل
 
أهل الكرم والطيب للطيب مدهال
اللي بمجالسهم تطيب التعاليل
 
دايم سوالفهم ترى تشرح البال
وهروجهم دايم بعيدة عن الميل
 
وقفاتهم للحق وقفات الأبطال
وفزعاتهم للناس ماهي بتمثيل
 
شوف الغني لاحس بالفقر يحتال
واما الفقير يجرفيها مواويل
 
تشوف بصناف البشر كل الأشكال
وتاخذ من الموجز جميع التفاصيل
 
ترى الرجوله بالمواقف والافعال
شوف المواقف كيف تصنع رجاجيل

تعليقات الزوار

كُل المحتوي و التعليقات المنشورة تعبر عن رأي كتّابها ولا تعبر بالضرورة عن رأي موقع الشعر.
بعض صور الشعراء و الشاعرات غير صحيحة، نرجو تبليغنا إن واجهت هذى المشكلة
إدارة موقع الشعر لا تتابع التعليقات المنشورة او تقوم بالرد عليها إلاّ نادراً.
للتواصل مع ادارة موقع الشعر إضغط هنا.