الوقت

يا وقت علمني وش اللي جنيته
حتى تخليني كذا بين نارين

بين الشقى واطلال حلمٍ بنيته
وبين الجروح اللي غدت بين حدين

يا وقت همي هم واللي طويته
لا تكشفه واستر علي ناس غالين

بينت لي من كان عمري عطيته
وكشفت لي قومٍ عزازٍ موالين

هذا ولد عمٍ وهذا فديته
بعيوني الثنتين واغلا من العين

واللي قريته شي بان وقريته
بعيونهم تفكير ناسٍ شياطين

ياليتها بقيت علي اللي هقيته
ولا بين الخافي ولا بان خافين

يا وقت وش سويت باللي شقيته
ووش تالية جرحك وبعدين بعدين

خليتني باحلام حلمٍ رجيته
تايه ولا ادري وين رايح علي وين

اللعب مع الهوجاس واعيش بيته
واحيا بثلث الليل واموت ثلثين

لا صاحبٍ وافي ليا ضقت جيته
ولا لي عناوينٍ ولا لك عناوين

قربت لي من كان بعده شريته
وابعدت عني قلوب ناسٍ محبين

يا ليتها بقيت علي اللي هقيته
ولا بين الخافي ولا بان خافين