الوقت

لـ خالد الهبيدة، ، في غير مُحدد

الوقت - خالد الهبيدة

ياغنيم والله لو يضيق الوقت وتزيد الهموم
ماللحمول الكايدات الا ظهور جمالها

اسوق رجلي للعلا والنوم م ابالعين نوم
الامنية في خاطري ويحلها حلالها

الوقت ماياوي لحد والحظ عيا لايقوم
ومن له حيله فالزمن يابن العرب يحتالها

وش حيلة الورع اليتيم في زحمة الوقت محروم
يضيق لاشاف العرب قامت تلم عيالها

تصلفقه جرد الليال الين خانته العزوم
الورع ضايق خاطره والناس داله بالها

دنياك لو تعطيك يوم بتحرمك عشرين يوم
نوبن يسرك حالها ونوبن يغثك حالها

لا بارك الله بالرجال اللي تخون باللزوم
لامن ضيقات الزمن غنت على موالها

من لا يذود اليا انتهم يعد في صف الرخوم
يبطي وريضان الظفر في ذمتي ماطالها

لاكبرت القاله وصار اللوم ماينفعك لوم
ارتك على اللي لا اعتزى دق الحمول وشالها

لا يسندك دون الرجال الا الزحازيح القروم
زبن الدخيل اللي حذف طاقيته وعقالها

ولا النفوس اللي تجرح بالأوادم والسلوم
قولولها في ذمتي لو تستريح اشوالها

من شق سترن للعرب لابد مايجيه يوم
والنار يكبر شرها فال الله ولا فالها

ترى الشجاعه والوفا والطيب والقلب الرحوم
عمدان بيت المرجله واسمى صفات خصالها

ولو طال بك عد السنين اعرف ترى العمر معدوم
لابد يوم ان هالحياة تشد عنك رحالها

يبقى القصيد اللي انكتب من قلب قوم لقلب قوم
يبقى على مر السنين المقبله وليالها

هذي حكايات الزمان اللي تدوم ولا تدوم
عاشت قصايد خلدت في هالحياة ابطالها

ولا انت لاضاق الفضا سوق لك در العلوم
وابيك تسمعني عدل في دقها وجلالها

ألد عيني للسما والمح تقاطيع الغيوم
انا اتحرى ديمتن عيا يجي همالها

مايغبن الرجال كود ذبح الأماني والحلوم
وكلمه تجرح خاطرها من الحيا ماقالها

تعليقات الزوار

  • كُل المحتوي و التعليقات المنشورة تعبر عن رأي كتّابها ولا تعبر بالضرورة عن رأي موقع الشعر.
  • التعليقات المنشورة غير متابعة من قبل الإدارة. للتواصل معنا اضغط هنا.
© 2021 - موقع الشعر