شف عبرة الوقت - سعد براك

شف عبرة الوقت لاحظ كم سقط من قناع
واقنع .. وخل القناعة منهلك وارتوى

اليا تجملّت قالوا حاول المستطاع
واليا تكلمت حق اتصير ما انته سوى

لاتزبن الضيق وفجوج الاراضي وساع
ألو الصعايب قبل يلوى ذراعك لوى

اظروف الايام صاع وقلّ الاوفاق صاع
الي متي ... كل ليلة فيه نجم يهوى ؟

ماهزني في زماني غير طيحة شجاع
شف عاد طيحة شجاع وفي عيون ابدوى

ياصعبها فالهجوم ومرّها فالدفاع
وش عاد باقي بعد طيحة شجاع وخوى ؟

ما كانت الريح هبة ريح عند الشراع
والبحر ما كان للغواص صدر حموى

ملّيت كثر الهروج ورغبة الاستماع
يطويني العمر والغايات ماتنطوى

يا صاحبي والجواب اللي بليا خداع
ابكاني الوقت مير الله رحوم وقوى

اضحك نهار اللقا واصبر نهار الوداع
الشمس ماتنحجب والحر ما ينشوى

بكره تهل المزون ويرتوى كل قاع
وتلقي على كل نايف ضلع ذيب يعوى

تعليقات الزوار

  • كُل المحتوي و التعليقات المنشورة تعبر عن رأي كتّابها ولا تعبر بالضرورة عن رأي موقع الشعر.
  • التعليقات المنشورة غير متابعة من قبل الإدارة. للتواصل معنا اضغط هنا.
© 2021 - موقع الشعر