فضحني في حضور الناس دمعي - غير معروف

عليك الشعر يسألني واكابر
بدنيا الشعر ماكني بشاعر

واعاند سطوة ابياتي الحزينه
عساي ألقى لطول الحزن آخر

أنا اللي عاش أيامه معذب
يداري احساس فالخفاق حاير

طويت الهم في صدري ولكن
عجزت أطوي معاناة المشاعر

فضحني في حضور الناس دمعي
ودمعي لاتحدر صار سافر

معك مدري علام الكون ضدي
أشوفه بالأسى ضدي يجاهر

رفض حظي الردي يرفق بحالي
علام الحظ للعشاق جاير

وحبك في حنايا الروح يسري
يعاند قلب متألم وصاغر

من إحساس الهوى ياويل قلبي
إذا مزق حنينه كل ساتر

تداوي علتي وكبت العواطف
بكلمة حب لو هي جبر خاطر

متاهات الخفوق اللي يحبك
غديت بحضنها عاشق مغامر

مضى عمري وحبك في خيالي
كتبته فوق خدي بالسواطر

يمر وقتي وأنا عاشق متيم
إذا ضاقت همومه قال باكر

متيَّم يرتجي بلسم محبه
ولكنه رغم جرحه يكابر

© 2024 - موقع الشعر